भरत गावित यांच्याकडून स्थानिक स्वराज्य संस्था निवडणुकीसाठी रणशिंग: "शक्य तितके उमेदवार निवडून आणण्यासाठी सर्वांनी कंबर कसा"
नवापूर(प्रतिनिधी): नवापूर शहरात आगामी जिल्हा परिषद आणि नगरपालिकेच्या निवडणुकांच्या पार्श्वभूमीवर राष्ट्रवादी काँग्रेस पक्षाच्या (अजित पवार गट) कार्यकर्त्यांची एक महत्त्वपूर्ण बैठक नवापूर टॉऊन येथे ज्येष्ठ कार्यकर्ते भरतभाऊ गावित यांच्या नेतृत्वाखाली मोठ्या उत्साहात पार पडली. यावेळी नवापूर तालुका आणि शहरातील राष्ट्रवादी काँग्रेस (अजित पवार गट) चे सर्व प्रमुख पदाधिकारी उपस्थित होते.
कार्यक्रमाची सुरुवात देवमोगरा माता, जननायक बिरसा मुंडा, डॉ. बाबासाहेब आंबेडकर आणि जिल्ह्याच्या पहिल्या महिला जिल्हा परिषद अध्यक्षा स्व. हेमलाताई वळवी यांच्या प्रतिमेचे पूजन व दीपप्रज्वलन करून करण्यात आली, ज्यामुळे सामाजिक सलोखा आणि आदरभाव दिसून आला. या बैठकीला माजी जिल्हा परिषद महिला बालकल्याण सभापती संगिता गावित, राष्ट्रवादी काँग्रेस (अजित पवार गट) चे जिल्हा उपाध्यक्ष नरेंद्र नगराळे, तालुका अध्यक्ष दिलीप आरजू गावित, अल्पसंख्याक तालुका अध्यक्ष इद्रीस पठाण, मागासवर्गीय सेलचे तालुका अध्यक्ष छोटु अहिरे, शहर अध्यक्ष मनोहर नगराळे, महिला शहर अध्यक्ष चित्राबाई चव्हाण, सहसचिव दिनेश बिरारी, सचिव दिनकर गावित, माजी नगरसेवक रमणा राणा, आनंद नाईक, जालमसिंग गावित, दिनकर गावित, तालुका उपाध्यक्ष सविता गावित, सहसचिव आयुब गावित, उपाध्यक्ष देवदर कोकणी, जगन कोकणी, नकुल देसाई, सुमन गावित, आयुब गावित, अंबादास आतारकर, रविंद्र साळुखे, माजी नगरसेविका मेघा जाधव, शरद पाटील, मिलिंद निकम आदींसह अनेक मान्यवर मंचावर उपस्थित होते.
नवीन प्रवेशकर्त्यांचा सत्कार आणि नियुक्तीपत्र वाटप..
कार्यक्रमाच्या सुरुवातीला भरत गावित यांनी उपस्थित मान्यवरांचा सत्कार केला. यानंतर राष्ट्रवादी काँग्रेस (अजित पवार गट) मध्ये अनेक महिला, पुरुष आणि युवक-युवतींनी प्रवेश केला. या सर्व नवीन सदस्यांना नियुक्तीपत्र देऊन भरत गावित, नरेंद्र नगराळे आणि मंचावरील मान्यवरांनी सत्कार केला, ज्यामुळे पक्षात नवचैतन्य संचारले. नवापूर शहर कार्यकारिणीच्या पदवाटपाचा कार्यक्रमही मोठ्या उत्साहात संपन्न झाला, ज्यात पक्षाच्या महिला आणि पुरुष आघाडीच्या नवनियुक्त पदाधिकाऱ्यांनी आपापल्या पदांची सूत्रे स्वीकारली.
राष्ट्रवादी काँग्रेस विकास करणारा पक्ष: भरत गावित
राष्ट्रवादी काँग्रेस पक्षाचे ज्येष्ठ कार्यकर्ते भरत गावित यांनी आपल्या भाषणात सांगितले की, राष्ट्रवादी काँग्रेस (अजित पवार गट) हा विकासाला प्राधान्य देणारा पक्ष आहे. त्यांनी स्वर्गीय गोविंदरावजी वसावे यांचे स्मरण केले, जे राष्ट्रवादी काँग्रेसचे पहिले लोकनियुक्त नगराध्यक्ष होते आणि त्यांनी नवापूर तालुक्यात खऱ्या अर्थाने पक्षाला वाढवले व सर्वांना न्याय दिला.
भरत गावित यांनी सध्या सुरू असलेल्या 'लाडकी बहीण योजना' सह विविध शासकीय योजनांचा उल्लेख केला, ज्यामुळे अनेक महिलांनी आपले व्यवसाय सुरू केले आहेत. त्यांनी उपस्थित सर्व पदाधिकारी आणि कार्यकर्त्यांना आवाहन केले की, महिलांसाठी नवापूर शहरात भांडे वाटपाचा कार्यक्रम लवकरच आयोजित करण्यात येणार आहे, ज्यामुळे महिलांना नंदुरबार येथे जाण्याची गरज भासणार नाही.
एकजुटीने काम करण्याचे आणि पक्ष वाढीला प्राधान्य देण्याची आवाहन..
भरत गावित यांनी कार्यकर्त्यांना पक्षात काम करताना समज-गैरसमज न ठेवता, एकजुटीने पक्ष मोठा करण्यासाठी कामाला लागण्याचे आवाहन केले. सर्व पदाधिकारी आणि कार्यकर्त्यांना शासकीय योजनांची माहिती असणे आवश्यक आहे, असे त्यांनी अधोरेखित केले. नवापूर नगरपालिकेत आपला उमेदवार कसा निवडून येईल, यासाठी सर्व पदाधिकाऱ्यांनी अधिक मेहनत घेण्याची गरज असल्याचे त्यांनी सांगितले.
राष्ट्रवादी काँग्रेस पक्ष सर्व धर्मांच्या लोकांना सोबत घेऊन चालणारा पक्ष आहे. सर्वांना शासकीय योजनांचा लाभ कसा मिळेल यासाठी उपमुख्यमंत्री अजितदादा पवार यांच्या संपर्कात आपण स्वतः, दिलीप गावित आणि नरेंद्र नगराळे असल्याचे त्यांनी नमूद केले.
आमदारांवर टीका आणि विकासाचा मुद्दा...
भरत गावित यांनी नवापूरच्या आमदारांवर टीका केली. ते म्हणाले की, आमदारांनी आतापर्यंत एकही विकास काम केले नाही. विकासात्मक काम कुठेही दिसत नाही. निष्क्रिय आमदार असल्याचा आरोप केला. शहराच्या रस्त्यांची अवस्था अत्यंत गंभीर असून, त्यांचेच नगरसेवक रस्त्यांवरील खड्डयांसाठी आंदोलन करत आहेत, ही बाब अत्यंत निंदनीय असल्याचे त्यांनी सांगितले.
यानंतर महिला सचिव चित्रा चव्हाण आणि अनिल पाटील यांनीही आपले मनोगत व्यक्त केले. कार्यक्रमाचे सूत्रसंचालन नवापूर तालुका अध्यक्ष दिलीप गावित यांनी केले आणि राष्ट्रगीताने कार्यक्रमाची सांगता झाली. या बैठकीमुळे आगामी निवडणुकांमध्ये राष्ट्रवादी काँग्रेस (अजित पवार गट) नवापूरमध्ये अधिक सक्रिय भूमिका बजावेल, असे संकेत मिळाले आहेत.
